VISITA MONSTROSA!

Comezou un novo curso e como xa sabedes, a galaxia dos monstros verdes fíxose un pouco máis grande... Dous dos monstros cambiamos de ubicación e acabamos ampliando a nosa galaxia ata Covas e Cervo... Pero eso non significa que non nos acordemos uns dos outros!

O pasado mércores fixen unha visita relámpago ata o cole do Vicedo e que ben o pasamos! 
Foi pouquiño tempo pero puidemos falar de como nos foi o verán e coñecer a nova aula de 4º e 5º.

Aquí vos deixamos unha foto para o recordo! Agardo que pasedes un curso xenial e que podamos vernos nalgunha outra ocasión!

Apertas monstrosas para todos!!!

PARA OS MEUS MONSTROS VERDES

A ninguén lle gustan as despedidas, nin pensar que o que tan felices nos fixo ten que cambiar de novo, pero é necesario amosar o cariño e dar as grazas a todos, así que non podía facer outra cousa que escribir esta entrada no blog da galaxia dos monstros verdes...

Gracias aos meus nenos e nenas, sí digo "meus" porque logo dun curso xuntos xa somos unha familia enorme, gracias ás familias que sempre nos axudaron a facer deste curso un curso para aprender e crecer como persoas e gracias tamén a todos os que nos seguistes e comentastes neste espazo no que compartimos tantas actividades!

Agardamos que o pasarades ben vendo como traballamos e nos divertidos xuntos, pero non deixedes de seguirnos! que aínda nos quedaron moitas entradas no tinteiro e ao longo do verán (pouco a pouco que estamos de vacacións...) irémolas subindo.

Aquí vos deixo unha imaxe especial... agardo que ningún dos que aparecemos nela esqueza todos os fermosos momentos que pasamos durante este curso :)

MOITOS BICOS MONSTROSOS... 

Sempre seredes os meus monstros verdes!

Vero

CASTREXOS E ROMANOS

Está rematando o curso e na aula dos monstros verdes xa somos uns expertos na Prehistoria e Idade Antiga... 

En vindeiras entradas ensinarémosvos un miniproxecto de arte e algunha que outra cousiña, pero hoxe queremos que vexades como a nosa clase se converteu nun pequeno museo romano e castrexo!

En primeiro lugar queremos darlles as grazas á Asociación Terra Copora por deixarnos todas as cousiñas, quedamos abraiados!!! GRACIAS...

E agora... mirade mirade!

Primeiro expuxemos todas as pezas no centro da aula, separándoas entre romanas e castrexas. Como xa sabíamos moitas cousas sobre o Imperio Romano, os Celtas, Os Iberos, Gregos... puidemos ver en que se parecían e diferenciaban entre si e se coincidían coas imaxes que vimos nos libros.

Logo de explorar e falar sobre todas as pezas fixemos un inventario, anotando e ilustrando cada unha delas.

Por último, non puidemos resistirnos a facernos unhas fotos... agardamos que os membros da Asociación Terra Copora non se fixen moito nos atuendos jajajaja queríamos poñer todo xunto aínda que historicamente non fose moi axeitado :)

Pasámolo xenial!!

Ah!! E como a nosa mestra, Vero, é de Lugo, queremos recomendarvos unha festa moi especial, que se celebrará os días 30 de Xuño e 1 e 2 de Xullo, o Arde Lucus. Se ides, seguro que o pasaredes xenial...

Ata a próxima monstros verdes!

MONSTROS VERDES... E LECTORES

Para conmemorar o día das nosas letras realizamos moitas actividades ao longo do mes de Maio... 

A que vos ensinamos hoxe é a que fixemos compartindo momentos de lectura e diversión cos compañeiros e compañeiras de 1º e 2º. Esta actividade chámase: MADRIÑAS E PADRIÑOS LECTORES!

Foi moi divertido porque cada un de nós tiña que escoller un conto en galego para o noso afillado ou afillada, e lerllo no patio da escola. Parece que non só nos gustou aos padriños e madriñas, porque segundo a enquisa que lles fixemos ao día seguinte todos quedaron encantados e con ganas de repetir!

Aquí vos deixamos as fotos!!

CLUB DEPORTIVO BURELA FÚTBOL SALA

O pasado 16 de Marzo tivemos unha visita moi especial... tres xogadores e o adestrador do Club Deportivo Burela Fútbol Sala estiveron no cole!

Primeiro estivemos na biblioteca onde nos ensinaron un vídeo sobre a historia do clube, tanto do equipo masculino coma do feminino. 

 Despois estivemos no pavillón facendo quencemento, exercicios sinxelos co balón e para acabar... xogamos un partido todos xuntos!

Que ben o pasamos! :)

CELEBRANDO O DÍA DA FAMILIA

Na galaxia dos monstros verdes celebramos o día da familia realizando unha actividade moi pero que moi divertida!

Un 3 en Raia para compartir coas nosas nais, pais, avós, irmáns... seguro que disfrutaredes moitísimo xogando xuntos!

E se queredes facer un coma este só tedes que seguir os seguintes pasos:

O primeiro, necesitades ter todos os materiais: un azulexo, unha regra, un rotulador permanente, témpera de cores, pasta branca, moldes de galletas para as formas das fichas, goma eva de cores, torqueladoras e verniz para o acabado brillante.

Agora xa podemos empezar.

1. Dividir o azulexo en 9 partes iguais (nós empregamos a regra para medir... e dividimos entre tres). Unha vez feitas as liñas co rotulador permanente cada un pintamos coas cores que máis nos gustaban.

2. Facer as fichas. Tres con forma de corazón e tres con forma de flor. 

 3. Pintar as fichas de dúas cores. Recoméndase non empregar as mesmas cores escollidas para pintar o azulexo.

 4. Por último, deixar secar e... a xogar! Aquí estamos xogando nós para practicar un pouco antes de levar o xogo para as casas :)

E aquí abaixo podedes ver como Carla está compartindo xogos co seu pai! Misión cumplida!

UNIDADES DE LONXITUDE - LANZAMOS CANICAS

Para comezar a traballar as unidades de lonxitude o mellor é experimentar!

Así que iso foi o que fixemos empregando unhas canicas, unhas cintas métricas e un espazo aberto.

 A actividade consistía en lanzar as nosas canicas o máis lonxe posible e medir coas cintas métricas cantos centímetros ou metros de distancia lograron percorrer.

 Non foi sinxelo, en algún caso tivemos que medir varias veces porque as algunhas canicas chegaron realmente lonxe.

 Unha vez medimos coa cinta métrica, copiamos os datos na ficha de unidades de medida e logo, na aula, pasamos os centímetros a metros...

Por último empregamos outro sistema de medición... unha unidade de lonxitude de orixe natural: os nosos propios pés! empregada en civilizacións antigas, como na Antiga Grecia ou na época dos romanos (o pé romano equivalía a 29,57 cm)

Desta maneira descubrimos como se medían as distancias antes de empregar o sistema métrico decimal. Non era mala idea empregar partes do corpo para medir, pero descubrimos que non eran tan exactas!
Agora só nos queda comprobar que medimos ben comparando os cm e pés que temos apuntados na ficha! 

NORABOA ANA!!

A todos os monstros verdes encántanos a entrada de hoxe... 

A nosa compañeira Ana foi a gañadora do II Concurso de Debuxo da Romaxe Vikinga que se celebrará o vindeiro 29 de Xullo en San Román!

 Por segundo ano consecutivo unha ilustración da nosa clase será a imaxe do cartel e estamos moi pero que moi contentos.

 Nestas fotografías podedes ver a sorpresa que levou Ana cando viu o seu debuxo no cartel, e o momento da recollida do premio.

A presentación da Romaxe Vikinga deste ano e entrega de premios foi un evento moi importante que se celebrou na Casa da Cultura. Aquí abaixo podedes ver a súa repercusión nas redes sociais!

Noraboa Ana!

Seguro que será unha festa moi divertida, agardamos que todos podades ir e pasalo xenial! 

DÍA DAS LETRAS GALEGAS 2017 - CARLOS CASARES

A semana pasada celebramos o Día das Letras Galegas, que como xa dixemos estivo adicado ao autor Carlos Casares.

Despois de realizar moitas actividades como o Correlingua, investigacións sobre a obra e vida do escritor, lecturas na aula... reunímonos todos na sala de usos múltiples e...

Alí puidemos desfrutar coa lectura colectiva da obra "A Galiña Azul" na que participaron alumnos e alumnas de infantil e primaria...

 

Tamén foi a entrega de premios co concurso "Ilustrando os libros de Carlos Casares"... mirade que marcapáxinas tan fermosos levamos todos os participantes!

E aquí tedes os nosos gañadores! Alberto e Carla Vale

PLANTAMOS XIRASOIS E FLORES CAPUCHINAS

A finais de Abril na aula dos monstros verdes plantamos xirasois e flores capuchinas! E como xa tiñamos experiencia de cando plantamos ourego e eneldo, foi moi fácil facelo!

O primeiro que necesitamos foron as sementes, terra preparada, macetas e unha regla porque cada unha delas tiña que ser plantada a unha medida de profundidade diferente.

E puxémonos mans á obra... bueno, máis ben mans á terra :)

Cada un de nós plantou unha especie en cada maceta...

Para sementar medimos os nosos dedos coa regla porque desta maneira era máis sinxelo! En pouco tempo tiñamos 30 sementes perfectamente plantadiñas... agora só nos queda esperar a que nazan!

Pouco a pouco colocamos todas as macetiñas ao lado do noso ourego e eneldo, que se vos fixades veredes que xa comezou a nacer :)

Estade atentos porque en breve informaremos de como evolucionan as nosas plantiñas!!

NO VICEDO FALAMOS GALEGO! CORRELINGUA 2017

O pasado martes 9 de Maio participamos no Correlingua 2017. Este ano a cita para os coles da Mariña era Viveiro así que os monstros verdes preparamos uns carteis chulísimos!

Chegamos á estación de autobuses e dende alí dirixímonos ata a praza Maior, pero non pensedes co único que fixemos foi dar un paseo... a nosa camiñada estivo amenizada de cantigas e rimas en prol do galego:

- De onde vimos? DO VICEDO

- E que falamos? FALAMOS GALEGO!

A Praza Maior estaba repleta de nenos e nenas de outros coles, ao longo da mañá chegamos a participar máis de 2.000 

Na seguinte fotografía estamos cos compis de 5º e 6º e a pancarta que fixeron co lema do Correlingua 2017 " En galego, sen cancelas".

Por último, aproveitando que estabamos en Viveiro, visitamos no Concello a exposición "A Mariña con moita arte" que é un proxecto colaborativo das bibliotecas escolares da zona da Mariña Occidental... Gustounos moitísimo! Se queredes saber máis sobre este proxecto premede AQUÍ

Na Praza vimos a actuación de Cé Orquestra Pantasma e a presentación da actriz Isabel Risco... Pero non puidemos escoitar o pregón nin ver as demais actuacións porque se nos arrefriaba o xantar jijiji para o ano seguro que o vemos enteiriño!

Neste enlace podedes ver a nova no xornal "La Voz de Galicia"

http://www.lavozdegalicia.es/noticia/amarina/viveiro/2017/05/09/mais-dous-mil-alumnos-na-defensa-do-galego-traves-do-correlingua-viveiro/00031494329360583344537.htm

DIVIDIR CON MATERIAIS NATURAIS

Dividir é repartir!...

Quen dixo que non se podía dividir empregando materiais naturais? Na clase dos monstros verdes pensamos que si somos capaces de repartir un montón de ramiñas entre os catro, xa somos capaces tamén de dividir! Si é así de sinxelo, aínda que logo todo se pode complicar moito moitísimo máis... pero o importante é ir pouco a pouco e entendendo o que facemos. Nesta ocasión Petru, Ainhara, Carla e Lorena saíron ao patio a realizar operacións e traballar a división a través da manipulación, da observación e da experimentación.

E unha vez comprobamos en que consiste o proceso de dividir, comezamos a realizar as operacións no noso caderno. Primeiro con divisións exactas e despois resolvendo operacións un pouco máis complexas.

Para finalizar o proceso facemos a comprobación empregando a calculadora... todo perfecto!!

Pero hoxe non só comprobamos os resultados das divisións... tamén puidemos comprobar que facer mates ao aire libre é posible... e divertido!

MARES DE CULTURA: O FARO DE ESTACA DE BARES

A semana pasada fixemos unha excursión ao Faro de Estaca de Bares continuando coas actividades "Mares de Cultura, os nenos e o mar".

Uns días antes, coma sempre, fixemos unha pequena investigación para coñecelo un pouquiño mellor antes de visitalo.

Descubrimos que está no Concello de Mañón, moi pretiño da nosa escola, que a súa torre mide 30 metros, que está en funcionamento dende 1850... e algo moi importante:

... separa o Mar Cantábrico do Océano Atlántico!

 Cando chegamos facía moitísimo vento, mirade que pelos :) Patricia e Lorena case saen voando!

 Antes de coñecer a, Eugenio, o fareiro, é obrigado facer unha foto de grupo... esta vez parece que engadimos un monstro verde á nosa clase.. A ver se o atopades! jijijiji

 E aquí está Eugenio Linares, o último fareiro de Estaca de Bares... 

Explicounos moitas cousas sobre os faros e a súa importancia para a navegación marítima e aérea, pero tamén nos convidou a subir á torre do faro onde puidemos ver a inmensa lámpada, e a fermosa paisaxe co rodea. 

 Aquí estamos! Foi unha oportunidade única poder subir todos xuntos!

 E aproveitando cos compañeiros de 5º e 6º (aos que se sumaron Carla Vale, Alex, Ana e Carla Salgueiro) estaban na torre, nós decidimos dar un pequeno paseo polos arredores.

Foi unha mañá moi interesante e pasámolo xenial! Agardamos que vos gusten as fotos e que visitedes o Faro de Estaca de Bares en canto teñades oportunidade, é precioso!

Se premedes AQUÍ podedes ver un enlace sobre a visita publicado por maresdecultura.es

Ata a próxima monstros verdes!